لو بفـكر اشتغل في الـ E-Commerce افكر ازاي ؟
لو بفـكر اشتغل في الـ E-Commerce افكر ازاي ؟!
كالعادة وقبل اي حاجة صل على النبي وتعالى ندردش شوية
لو انا بفكر أبتدي في ال E-Commerce المفروض اعمل ايه !؟
خليني اوضحلك كام نقطة وبعدين نكمل
لو بادئ عشان مكسب سريع ف ده مش مكانك
لو فاكر انك مش هتتعب ومش هتخسر ف ده مش مكانك
لو مش عامل خطة واضحة وعندك أهداف تمشي عليها ف ده برضوا مش مكانك
لو انت مش اي حاجة من اللي فوق بقا دول ف تعالى نتكلم
في الغالب لو جالك تفكير انك عايز تشتغل ف ال E-Commerce ف انت اما شوفت حد ناجح في الحته دي وعايز تعمل زييه
او انت عندك منتج كويس وفاكر انك ال Social media المكان الأفضل ليه
او عندك محل بتبيع فيه منتجات وعايز تزود مبيعاتك
في كل الحالات انت متجهه للحته دي عشان تبيع كتير بس قبل ما تبيع كتير تعالى أقولك ايه المفروض اول حاجة تفكر فيها
هو انا
هبيع ايه ؟
هبيع ل مين ؟
هبيع على ايه ؟
هبيع ازاي ؟
هبيع ايه ده المنتج بتاع حضرتك اللي بتفكر تبيعه وده اما هو منتج فعليا عندك او منتج انت لسا هتصنعه
او هتشتريه من مورد وتدفع فلوسه
طيب التفكير في المنتج بتاعك اصلا لازم يكون قائم على أسس وفاهم يعني ايه منتج وايه العوامل اللي بتنجحه
وأول خطوة في التفكير في المنتج بتاعك انك تبدأ تعمل Search عليه
تشوف هل في حد بيقدم نفس المنتج ده او منتج شبيه ليه طب بيقدمه ازاي والخ
والجميل هنا انك عشان تعرف المنافس بتاعك اوي ممكن تعمل منه أوردر وتتابع كل الـ Process بتاعته من اول ما عملت الأوردر وحتى لما وصلك
” انصحك في الجزئية دي تقرأ أكتر عن الـ Product Research هتفيدك جدا “
هبيع ل مين
السؤال ده معناه اني المفروض اكون محدد الفئة اللي انا هتكلم معاها دي عاملة ازاي وبتشتري ايه وامتى وازاي
خليني اقولك ان اي حد بيعمل الجزئية دي وهو مش واخد باله خليني اديك مثال لو انت هتفتح مطعم كرشة وممبار ف مش هتروح تفتحه في حته Class A كل اللي بيمشوا فيها بيطلبوا Seafood
لا هتشوف حتة متوسطة عشان الناس اللي في الطبقة دي هي اللي ممكن تكون بتحب الأكل الشعبي أكتر ومش بيقدروا يستغنوا عنه
فـ أختيارك ومعرفتك بالناس اللي هتخش ليك المطعم هي اللي هتخليك تحدد كل حاجة
هبيع على ايه
وقت م تعرف ال Segment اللي انت هتتعامل معاها هتعرف انت هتبيع على منصة ايه بالظبط يعني هتعرف الناس دي بتسيرش ع المنتج اللي انا هبيعه ده على Google اكتر ولا بتبص على اعلانات ال Facebook وبالتالي انا محتاج اشتغل على الحته دي
او الناس دي كلها موجودة على TikTok ودي المنصة اللي هبدأ عليها
وزي ما قولنا في المثـال اللي فوق انت كل ما بتحدد الفئة اللي هتشتري منك كل ما بيكون انك تجاوب على الأسئلة دي سهلة خصوصا انك بتكون خلصت الجزء الأكبر من المعادلة وهي العميل اللي بيشتري منك
هبيع ازاي
هبيع ازاي دي هتكون من اصعب المراحل اللي هتفكر فيها يعني لو هنتكلم في جزء زي الماركتينج ف احنا بيبقا لينا ستراتيجي ماشيين بيها ف هل الناس بتتفاعل اكتر مع الصور ولا الفيديوهات
طب هل انا البيزنس بتاعي محتاج حد بتاع موديريشن يبقا بيتكلم مع الناس عشان يعرف يحجزلهم اوردر ولا هيكون اسهل للناس انها تطلب من الموقع دايركت
هل انت محتاج بس تكون موجود اونلاين على سوشيال ميديا بلاتفورم ولا محتاج كمان يكون عندك Website و Mobile app
وقت ما تعرف أجابه السؤال ده هتكون عارف انت هتبيع ازاي ونصيحة مني لو مش عارف هات حد عارف واسأله المفروض تعمل ايه..
ال ٣ اسئلة دي على الرغم انها بسيطة الا انها جواها شغل ووقت ومجهود كتير جدا ولو طلعت صح هتلاقي الدنيا بدأت تمشي معاك بشكل اوضح واسهل..
وعايز اقولك ان مش دي الأسئلة بس اللي هتسألها وانت بتبدأ ولكن دي حاجات لازم متفارقش تفكيرك وتكون من الأساسيات قدامك
البوست ده قصير مش طويل بس كان مهم نبدأ بيه قبل اي حاجة عشان اي بيزنس من غير شوية الحاجات دي بيبقا ماشي في ملكوت الله مش محدد اي حاجة ولا عارف هيبدأ ازاي
وأخيرا البوست ده المعلومات اللي فيه بناءا على التجربة وليس الا
ولو وصلت ل هنا ومحتاج اساعدك ف اي حاجة ف تقدر تبعتلي اي وقت ومتنساش تدعيلي دعوة حلوة بظهر الغيب.