الدروب شيبينج والأفيليت ماركتينج

الدروب شيبينج والأفيليت ماركتينج

بسم الله الرحمن الرحيم والصلاة والسلام على رسول الله

هنكمل كلامنا في سلسلة E-Commerce بعد التراويح

انهاردة كلامنا هيبقا عن الشغلتين اللي كل الناس فكراهم واحد وهما مش واحد

” الدروب شيبينج والأفيليت ماركتينج “

جهز كباية العرقسوس وتعالى بقا نرغي مع بعض كتير هنا.

الدروب شيبينج والأفيليت ماركتينج من اشهر نماذج الربح على الأنترنت الموجودة حاليا واللي أغلب الناس بتنصح بيها كـ مصدر دخل فرعي.

وسواء كنت عارف او لأ ف هما بيمثلوا دلوقتي مصادر دخل اساسية ل ناس كتير .

لكــن السؤال المحوري هنا…

اشتغل دروب شيبينج ولا اشتغل افيليت ماركتينج ؟

الأجابة هنا : أقرأ البوست كويس جدا وهتلاقي ملخص في الأخر بيقولك تعمل ايه

الدروب شيبينج احنا شرحناه بإستفاضة في البوست اللي فات فـ ممكن ترجعله هتعرف كل حاجة محتاجها

الدروبشيبينج هو بيع منتج عن طريق طرف تالت وشحنه للعميل بدون ما يكون ليك انت دخل في عمليه الشحن والتخزين

ولكـــن انت بتكون دافع تمن المنتج اللي الطرف التالت ده بيشحنه

فـ انت دلوقتي مالك للمنتج بس الأستوك مش عندك ومش انت اللي بتقوم بالشحن وغيره

التسويق بالعموله او الأفيليت ماركتينج ف هو نموذج بيع ل خدمة او منتج للغير وتحصيل عموله متفق عليها

من الشخص صاحب المنتج او صاحب الخدمة

يعني الأختلاف الجوهري هنا انك في الدروب شيبينج بتشتري منتج من مورد اما في الأفيليت ف انت مش بتشتري المنتج ولكن بتسوق ليه وبتاخد انت عموله بس على البيع

ف انت مش خسران تمن المنتج ولا مغامر بأي حاجة غير بالفلوس اللي بتدفعها للتسويق

– طب هل يا قنديل كدا ده معناه اني اشتغل في الأفيليت ومشتغلش في الدروب شيبينج عشان الأفيليت اسهل ؟

– الأجابة هنا : لأ مش ده القصد خالص

لو بصيت من نظرة تانية هتلاقي ان في حاجات كتير مختلفة اولها وحاجات هتعجبك في الدروب شيبينج ومش هتعجبك في الأفيليت وحاجات هتناسبك اكتر من حاجات

” الربح “

الدروب شيبينج ربحه بيختلف كتير عن الـأفيليت لأنك بتتحكم في سعر المنتج زي ما انت عايز

وكمان بيكون عندك قابليه انك تشوف اكتر من تاجر وتفاصل معاهم في اكتر من سعر وتاخد السعر اللي يعجبك

اما في ” اغلب ” منصات الأفيليت انت بيكون محطوط ليك عمولة محددة مينفعش تاخد اكتر منها وفي نفس الوقت مينفعش تبيع بسعر اعلى وتكسب اكتر

وده خد بالك هتلاقيها بتطبق اكتر على الخدمات اكتر من المنتجات

يعني هتلاقي في خدمات سعرها ثابت مش هتعرف تعدل فيه لأن ده سعر بيع الخدمة وعمولتك عليها محدده اما في اغلب المنتجات بتكون العمولة مش ثابته متغيره حسب سعر بيعك للمنتج

طيب تاني حاجة هي

” المنافسة “

خلينا نقول ان المنافسه مؤثر قوي في الصناعة دي

يعني في الدروب شيبينج انت لو لقيت منتج كويس وعرفت تخليه Winner ويطلع معاك بشكل كويس ومحدش غيرك شغال فيه هتعرف تتحكم في كل حاجة

واولها سعر البيع

ضيف على كدا انك طول ما المنافسة قليلة طول ما الأعلانات اللي انت بتعملها الـ Cost بتاعها قليل يعني بتدفع قليل وبيجيلك كتير

في اغلب الأفيليت بتكون المنافسة عالية جدا سواء في المنتجات او التسعير او اي حاجة

لأن مش بيكون شغال شخص واحد بيكون شغال الاف الأشخاص على نفس المنتج

منهم اللي بيكون فاهم واللي بيكون مش فاهم

في Tip هنا صغيرة

اللي هيتعبك هنا هو اللي مش فاهم مش اللي فاهم لأن اللي مش فاهم بيبوظ عليك المنافسه وبيحط سعر قليل جدا وهو مش واعي ده هيكسبه او هيخسره

وكمان مش بيهتم بالعـميل بتاعه وبتبقا بالنسبة ليه سبوبة وهتخلص وشكرا

فـ انت لو هتشتغل في الأفيليت ركز على منتجات مش كل الناس بتعرف تشتغل عليها ومش مشهورة كتير عشان تشتغل براحتك

اخر حاجة

” الميزانية “

ودي لو مركز من اول البوست هتعرف انها مختلفة في الأفيليت والدروب شيبينج لأنك لو شغال افيليت وبتصرف جنيه هتصرف في الدروب شيبينج 10ج

وده لأسباب كتير اوي هنناقشها بإذن الله في البوستات الجاية عشان البوست ده ميطولش اكتر من كدا

الملخص من كل الكلام اللي مكتوب فوق ده

ان سواء شغال افيليت او دروب شيبينج ف لازم تكون فاهم E-Commerce

وعارف كل الحاجات اللي ممكن تستفيد بيها وايه اللي يمشي معاك انت مش ايه اللي كويس وخلاص