من 40 الف ج لـ 80 الف ج في شهر ونص
من 40 الف ج لـ 80 الف ج في شهر ونص 
بسم الله الرحمن الرحيم والصلاة والسلام على رسول الله
من فتـرة كان في نـاس صحابي عـايزين يشتغلوا في الـ E-Commerce ويفتحوا حاجة لوحدهم يعملوا منها فلوس كويسة تمشي حياتهم
خصوصا ان كان وقتها كل واحد عنده التزامات زيادة على اللي بيدخله
وفي قعـدة صحـاب قولتلهم تعالوا أعملكم حاجة تبنوا فيها واحدة واحدة ولو قدرتوا فعلا تعملوا حاجة كويسة هتعملوا منها فلوس تكفيكم
وعشـان انا اول حاجة بتيجي في بالي لما حد يبقا محتاج يمشي نفسه على الأقل هي الملابس فـ اقترحت عليهم ان ليه منعملش كدا
ونجرب مش هتخسروا حاجة 
ورقة وقلم وبدأنا نكتب محتاجين ايه ؟
– مصنع ( موجود )
– قماش ( عارفين طريقه )
– منتجات ( هقولكم طريقتها ازاي )
– اوبريشن ( اشتغلوا من بيوتكم طالما لسا الدنيا صغيرة )
– اعلانات وغيرها ( دي لعبتهم وانا معاكم فيها لو احتجتوا حاجة )
وبعد ما رسمنا كل حاجة بالورقة والقلم يلا محتاجين ايه ؟
محتاجين نبدأ !
طب معانا فلوس قد ايه ؟
كل اللي معانا 40 الف ج 
حلو اوي يعني احنا محتاجين نتحرك في منتج قماشه ميزدش عن 30 – 35 الف ج عشان نقـدر نصرف اعلانات ونحصل فلوس
وبالفعـل ده اللي حصـل تاني يوم بيلفوا على تجار القماش ويشوفوا الخامات اللي يقدروا يستخدموها في التصنيع
وعشان الموضوع كان في نص الشتا فـ كان اغلب التجار خلاص نزلوا الخامات الصيفي وبدأوا يلموا الشتوي
فـ تعبوا شوية عشان يلاقوا خامات يشتغلوا بيها
وعملنا جروب صغير نختار فيه المنتجات وطلعنا موديل معين كان بيتعمل منه خامة جباردين – احنا حولناه لـ ميلتون عشان دي الخامة اللي كانت متاحة معانا
نزلوا اتفقوا مع صاحب المصنع على التصنيع والخامات اللي هيشتغلوا بيها وازاي يقـدروا يوصلوا لأقل Cost في التصنيع من حيث القص والهوادر وغيرها
كل ده خلص ويلا نطلع بالشغل بتاعنا واعلاناتنا
ناقصنا ايه ؟
شركة شحـن !
هنتفق مع شركة شحن صغيرة في المكان اللي احنا فيه عشان الكاش فلو وعشان البيك اب وشوية حاجات تانية
يلا نطلع اوردرات ؟
الحمدلله اول تصنيعه كانت موفقة واشتغلوا اسبوع في التاني في التالت في الرابع
وبعد شـهر ونص المنـتج ماشاء الله شغال وبيصرف أرقام كويسة الكاش فلو بدأ يدور والدنيا تمام هما داخلين الموسم اللي بعده بـ ضعف الرقم اللي بادئين بيه
وعلى قد ما الرقم يبان صغير الا انه وراه رحلة جميلة وتعب تجهيز مش طبيعي 
كنت مبسوط وقتها اني قدرت اخليهم فعلا يعملوا حاجة وعلى الأقل يبنوا بيزنس صغير يصرف على نفسه وعليهم ويحققوا منه ارقام كويسة
كـل التجهيزات اللي فـوق والحاجات دي 1% من الحاجات اللي اتعملت على أرض الواقع
والتفاصيل اللي فعلا خدت وقت ومجهود عشان نعملها مع بعض والمشاكل اللي كانت بتطلع ونقعد نحل فيها