فن إدارة الإنفعالات

فن إدارة الإنفعالات

في سيـشن صغيرة ساعة ونص تقـريبا لـ يـاسر الحزيمي كان بيتكلم فيها عن ” الشخصية القوية “

وكـان أول حاجة قالها إيه تعـريف الشخصية القوية !

الشخصية القوية : هي السيـطرة على الذات في المواقف والتحكم في الإنفعالات سلبا وايجابا.

النـاس عندها دايما خلط بين الشخصية القوية والثقة بالذات

لو حطينا للشخصية القوية 4 مكونات فـ هيكونوا الأتي :

1- تقـدير الذات

وتقدير الذات هنا هو رأيي في نفسي فقط بدون أي شئ

او بمعنى اصح معرفة قيمتك وقيمة الأخرين من حولك

فـ لو بصـيت على الشخص المتكبر هتلاقيه ضعيف الشخصية

لأنه مقدر ذاته انه دايما أكبر من الناس

فـ حتت تقـدير الذات دي انت لازم تكـون عارف فيها رأيك في نفسك وحاطط الناس في أماكنهم الصحيحة

2- الثقة بالذات

وتعـريف الثقة هنا هي : شعور بالقدرة مع وجودها

وعكسها الغرور : شعور بالقدرة مع عدم وجودها

لو قدامنا شخص قـادر وبيشعر بالقدرة دي فـ هو شخص واثق في نفسه

لو قدمنا شخص تاني قادر بس لا يشعر بالقدرة دي فـ هو شخص محتقر لـ ذاته

معرفتك لـ ذاتك وحدود قدرتك وشعورك بيها هو اللي هيخلي عندك ثقة بالنفس

وده يدخلنا في جزئية تانية وهي الوعـي

الشخص الواعي هو اللي عـارف حدود قدرته وبيقدر يحدد ما اذا كان قادر فعلا او لأ

وعشـان تعـرف ذاتك لازم تكون عـارف ان الذات جزئين

جزء مرئي للناس وجزء غير مرئي

الجزء المرئي : هو الجزء اللي تقدر تشوفه في المرايا

يعني من الأخر حاجة انت شايفها وعـارف انها محتاجة تتعدل

اما الجزء الغيـر المرئي : هو جزء انت مش قادر تشوفه

وهنا بيكون الـحل ليه ان يكـون عندك ” صديق صدوق ” قادر انه ينصحك ويقولك الجزء اللي انت مش شايفه ده ايه

وحطينا مثال هنا ان الشخص اللي دمه تقيل مش عارف انه دمه تقيل هو بيقعد يقول نكت والناس تضحك عليها عشان تجامله وخلاص

ولو قسمنا جزء الذات ده فـ هو هيروح مننا لـ 4 أجزاء

– شخص واضح : هو عـارف ذاته والناس عارفينها

– شخص غامض : ودي بنقول عليها منطقة القناع يعني هو عـارف بس في ناس كتير متعرف او مخبي حاجات كتير

– شخص ميعرفش : وده شخص ميعرفش الحاجة والناس عارفينها والمنطقة دي اسمها المنطقة العمياء عشان هو ميعرفش فيها حاجات كتير وزي ما قولنا دي حلها صديق صدوق في ضهرك يعرفك الحاجات دي

– شخص ميعرفش والناس متعرفش : ودي المنطقة المجهولة وحاجات جوا الأنسان هو مش عـارفها ولا الناس يعرفوها

وده كدا جزء الثقة بالذات

الجزء اللي بعد كدا هو

3- توكيد الذات : ان تقول وتفعل ما تشعر به

وهنا بنلخصها بـ سؤال ازاي أعبر عن مشاعري ؟

لو مش عـارف فائدة توكيد الذات ف هتلاقي نفسك في أغلب الأوقات مبتتكلمش او مبتقولش اللي انت عايز تقوله بتسكت وتقول ما كدا كدا الناس اللي قدامي حاسين او عارفين

لازم تكـون عـارف ان لا أحد يعلم الغيـب الا الله

فـ متسكتش وتقول م هما هيعرفوا

الرابعة والأخيرة في الشخصية القوية بقا هي

4- تقبل الذات

انت مش محتاج تقدم نفسك بأنك استاذ فلان او دكتور فلان

ومثال اتقال في المحاضرة عجبني اوي لـ ياسر الحزيمي انه كاتب عنده على البروفايل لست دكتورا

انت مش محتاج يتقال لقب قبل اسمك عشان يديلك وزن معين

مش محتاج تلبس براندات معينة عشان يقولوا ده لابس براندات كذا

في كتير من الناس تروح تقول انا بن فلان وبيمسحوا شخصيتهم

دي ناس مش متقبله ذاتها بـ ذاتها مش متقبله انها يتقال عليها فلان وبس

وحاسه دايما ان فلان ده قليل ف لازم الزق فيه حاجة عشان يبقا كدا ليا وزن

بعـد ما تبص على الـ 4 حاجات دول عايزك تسأل نفسك سؤال واحد

ايه الحلقة الأضعف في شخصيتي ؟

وقت ما تطلع الحلقة الأضعف هتدخل في النقطة التانية اللي هنتكلم فيها هو انا هعدلها ازاي ؟

خليني ابدأ كلامي بـ حاجة وهي ان محدش بيغير حد

الأنبياء والرسل مقدروش يغيروا الناس بس قدروا ” يأثروا ” فيهم

خطوات التغـيير مش سهلة ولكـن لو حطيتها قدامك هتعرف انت محتاج تعمل ايه

اول خطوة في خطوات التغيير

1- ان تعـرف :

لازم تعرف ايه المشاكل اللي عندك وتطارد النقد متهربش منه

لـو روحت بصيت في المرايا ولقيت هدومك متسخه هتروح تغسل الهدوم مش تكسـر المرايا

فـ اعترف الأول بالمشكلة اللي عندك وبعدين أعمل على حلها

تاني خطوة

2- ان تعترف :

بعد ما عرفت المشكلة اعترف بيها قدام نفسك وقول ايوة انا عندي المشكلة دي من غير ما تبدأ تدافع او تبرر

” أكثر الناس تبريرا هم أقل الناس تغييرا “

تالت خطوة

3- ان تقرر :

اعقد النية على انك تتغير وحط قدامك قرارك ده واعرف انك هتغير كتـير اوي في نفسك عشان تنفذه بس اول حاجة أعقد النية

رابع خطوة واهم خطوة في التغيير

4- التكـرار :

دخول عادة جديدة تحل محل عادة قديمة بتعملها مش حاجة سهلة فـ لازم العادة الجديدة دي تتكرر طول الوقت وتفضل تعملها عشان تتثبت في عقلك اللاواعي ان دي العادة اللي هتفضل مستمر بيها

اختم معاكم بـ حاجة مهمة اوي

تقـدير الذات عامل زي الميزان ودايما في شعرة بين كـل حاجة وغيرها

شعرة بين التهور والشجاعة

شعرة بين العدوانية والإنهزامية

شعرة بين النرجسية والدونية

فـ أحرص تمام الحرص ان في تغييرك ده انت متكونش بتيجي على حاجة تانية في شخصيتك وانت مش واخد بالك

وأخيرًا وليس آخرًا

اللهم لك الفضل والحمد على ما علمتني وسبحانك اللهم وبحمدك، أشهد أن لا إله إلا أنت، أستغفرك وأتوب إليك