الـدروب شيببنج والربح السـريع
الـدروب شيببنج والربح السـريع 
بسم الله الرحمن الرحيم والصلاة والسلام على رسول الله 
بعد اول تراويح انهاردة اول بوست في سلسلة E-Commerce بعد التراويح
مع انتشار الـ E-Commerce بشكل كبير في العالم والوطن العربي بشكل خاص شوفنا ناس بدأت تتكلم عن انك ازاي تكسب فلوس بسرعه من التجارة الإلكترونية وازاي دي حاجة تخليك تعمل ملايين
وتلاقي فيديوز وصور بتتكلم على ” المنتج ده بيتباع على امازون بـ 100 دولار وعلى على اكسربيس ب 10 دولار “
وانت فجأة تسمع موسيقى اغنية القناص في الخلفية وتبدأ قد لمعت عينااااه
وتبص على ان اللي بيبع المنتج ده بيكسب فيه 90 دولار وقد ايه المبلغ ده كبير واللي بيقدم المحتوى بالشكل ده كل اللي بيكون باصصله انه يبنيلك قد ايه الموضوع سهل ومفيش فيه اي مشاكل فيه وهيخليك تكسب فلوس كتير في دقايق ومن غير مشاكل 
تعالى بقا اعرفك المجال اللي هما بيكلموك عنه في الفيديوهات دي واديك كلمتين في السريع فيه عنه.
بس قبل اي حاجة لازم تبقا عارف ان مفيش حاجة اسمها ” ربح سريع ” ” فلوس من غير مشاكل ” “فلوس من غير مصاريف “
تعالى بقا ندخل في الموضوع على طول
ايه هو الـ Drop Shipping
الـ Drop shipping نوع من الـ E-Commerce Business Models
بيعتمد على طريقة بيع منتجات بدون ما يكون عندك المـخزون
العملية دي بيكون فيها 3 اطراف ” المورد – المسوق – العميل “
المورد : هو الشخص اللي عنده المنتج وهو اللي بيقوم بشحن المنتج كمان للعميل
المسوق او الدروب شيبير : هو الشخص اللي بيبيع المنتج او بيقوم بكل العمليات عدا عمليه الشحن والتخزين دي لأن اللي بيقوم بيها المورد
العميل : هو الشخص اللي بيستلم المنتج وبيدفع فلوسه
في الطريقة العادية للـ E-Commerce انت بيكون عندك المنتج في المخازن بتاعتك وبتقوم بعمليه التخزين والشحن من مخازنك لكن في الـ DropShipping كل حاجة بتتم من عند المورد
الـ Dropshiiping بيحتاج رأس مال متوسط ف محدش يقنعك انك محتاج راس مال صغير عشان تبدأ تشتغل فيه
لأن المصاريف المخفية اكبر بكتير من المصاريف اللي ظاهرة قدامك
خليني بقا اجبلك الموضوع من البداية
لو هتبدأ DropShipping دلوقتي
محتاج ايه ؟
اول حاجة محتاج تدور على المنتج بتاعك ومش بس المنتج بتاعك لأ انت لازم الأول تختار المجال اللي هتشتغل فيه في البداية
سواء ادوات منزلية او ادوات مطبخ او حتى لعب اطفال المهم انك تكون عارف المجال اللي هتشتغل فيه في الأول
والحته دي هنتكلم فيها بإستفاضة الأيام الجاية
بعد كدا هتبدأ تدور على البلد اللي هتشتغل فيها وتشوف المورد اللي هتشتغل معاه في المنتج ده بيشحن للبلد دي ولا لأ
وهل هو اصلا بيوفر خدمة الـ DropShipping ولا لأ برضوا
في Tip كمان في أخر البوست هتفيدك في الحته دي
هتخلص الجزئية دي وتدخل في انك تظبط الـ Website بتاعك وفي الوقت ده انت هتبقا واقف قدام اختيارات كتير وحاجات انت مش فاهمها لو انت لسا بتبدي
زي اختار الدومين ازاي والأستضافة اختار ايه وكل القصص دي
وكالعادة لو معندكش خبرة يا اما تسأل يا اما تذاكر بس هو الموضوع مفيهوش لعب كتير طول م انت لسا في الأول ممكن تبدأ بالبسيط خالص
وهنتكلم برضوا في الحته دي في البوستات الجاية
وبعدين تبدأ تختار المنصة بتاعتك اللي هتعمل عليها اعلانات وتختار الـ Creatives وتجهز الـ Budget والخ…
وخد بالك اختيارك للمنصة اللي بتعمل عليها اعلانات دي مهمة جدا وبتفرق مع كل بلد بتشتغل فيها
شايف بقا كل الحاجات اللي انا قولتهالك فوق دي
ده جزء صغير لا يمثل 20% من حجم الصناعة ذات نفسها او الحاجات اللي انت مفروض تعملها
فـ انت متسمعش من الناس اللي بتقولك ان الموضوع سهل وانك هتجيب المنتج بـ دولار تبيعه ب 100 دولار وكل القصص دي عشان هي لو كانت سهلة كانت كله عملها من زمان
بس كل اللي اقدر اقولهولك انك لو عندك خبرة كويسة في الـ E-Commerce و بتعرف تاخد Risk وبتذاكر كتير فـ الـ DropShipping هيديك خبرة كبيرة جدا في المجال وكمان هيبقا مصدر دخل اضافي كويس تقدر تعتمد عليه
بالنسبة بقا عن المواضيع اللي قولناها في البوست ده زي اختيار المنتج والأستضافات وغيرها ف دي هتكون مواضيعنا الفترة الجاية ان شاء الله
في Tip اخيرة حابب اقولهالك ممكن تفيدك :
انك لو عاجبك منتج وعــايز تشتريه من الصـين ويتشحن على مخازن ” مش بتاعتك ” ويتخزن ويطلع منه اوردرات كمان للدولة اللي انت عايزها والتاجر اللي انت مكلمه مش موفرلك الخدمة دي ف فيه شركات بتقدم الخدمات دي مقابل نسبة من المنتج ف دي هتوفر عليك كتير اوي خصوصا لو عندك Winner Product وانت حابب تشتغل عليه في دولة معينة