التسـعير بين النجاح والفشـل!
التسـعير بين النجاح والفشـل! 
بسم الله الرحمن الرحيم والصلاة والسلام على رسول الله
من فترة كنت قاعد مع حد من الناس اللي شغالين في الفاشون، وبيشتكي إن مبيعاته ماشية كويس بس هو مش حاسس بالفلوس اللي معاه…
المشكلة مكانتش في المنتج بالعكس المنتج كان ممتاز وعليه طلب كبير لكن المشكلة كانت في التسعير.
الراجل كان حاطط سعر قليل جدًا لأنه كان فاكر إن السعر الأرخص هو اللي هيكسبه عملاء أكتر.
قولتله: التسعير مش مجرد رقم بتحدده وخلاص، التسعير هو معادلة بين الربح والنجاح. هو فن بيمزج بين فهم السوق، المنتج، والعملاء.
لـو مش فاهم الـ Cycle والـ Cashflow بتاعك بشكل يخليك معاك فلوس وبتكسب انت هتفضل تشتغل ومش حاسس انك معاك فلوس.
وقتها قعدنا ورقة وقلم وبدأنا نحسب الموضوع من الأول:
مين الجمهور المستهدف؟
إيه القيمة اللي العميل شايفها في المنتج؟
إيه تكلفة المنتج من إنتاج وتغليف وشحن؟
وكام السعر اللي يحقق ربح معقول؟
كـان محتاج يفهم اكتر فن التسـعير في جزئية الفـاشون بالذات والقصد هنا بـ فن التسعير…
التسعير على أساس القيمة: العميل مش بيشتري المنتج عشان السعر الرخيص، هو بيشتري عشان القيمة والجودة اللي شايفها فيه.
تحليل المنافسين: مش عشان نقلدهم، لكن عشان نحدد إحنا فين من السوق ده.
اختبار الأسعار: مش لازم السعر يبقا ثابت من البداية، نجرب نشوف السعر اللي هيحقق أعلى مبيعات بأقل تكلفة.
النتيجة؟
رفعنا سعر المنتج بدرجة تخليه فعلا قادر يكسب ويحس انه معاه فلوس مش كل الفلوس ضايعة في الأوبريشن والتغليف والهالك وغيرها وبدل ما المنتج يبقا سعره X جنيه، بقى بـX+1 جنيه
وده كـان فارق معاه بشكـل كبير خصوصا انه في الجزء الأولاني من التسعير في Hidden Costs هو مش واخد باله منها فعلا واكله كل الفلوس..