الأسئلة الوجودية الجزء الأول
المفروض أعمل كام اوردر في اليوم ؟
أحط التسعير للمنتجات ازاي ؟
أشتغل على منتجات ايه ؟
انا بالنسبة ليا دي اسئلة وجودية… يعني ايه بقا اسئلة وجودية دي ؟
يعني مينفعش تتسـأل
الـ 4 اسئلة اللي فوق دول بيسألهم اي حد بيبتدي E-Commerce او Affiliate او Drop shipping
أو بيشتغل اونلاين بشكل عـام ايا كان نوع الشغل اللي شغاله
ليه بقا دي اسئلة وجودية ؟
لأن محدش ينفع يقولك اجابة المفروض تعمل كام أوردر في اليوم دي
حط الجملة دي في دماغك “و بالأنجليزي عشان تترجمها وتحفظها 
“
” It depended on a lot of factors “
انا مش هقدر اقولك اشتغل بـ Budget قد ايه ومش هقدر اقولك انت المفروض تكسب كـام عشان اجاوبك على السؤال اللي بعده وهو أحط التسعير ازاي ؟
بس دايما كل حاجة بيكون ليـها Range بنتحرك فيه
مثال 1 : انا عايز اعمل 5000ج أخر الشهر عشان اعرف أكبر البروجكت
فـ بالتالي انا محتاج أطلع تقريبا 3 اوردر في اليوم ويكون فيهم Net profit = 55 L.E
عشان أجي اخر الشهر الاقي معايا الـ 5000ج دول او اقل منهم ب شوية لو انا مش حاطط تسعير صح
مثال 2 :
نفس الـ 5000ج اللي فوق دول طلع محتاج اطلع بيهم Net profit = 55
فـ معنى كدا اني لازم احط في المنتج +100ج Profit
عشان بعد التأكيدات والتسليمات والتعويضات والمرتجعات والخ..
نيجي بقا للسؤال التالت
اشتغل على بلاتفورم ايه ؟
في الحقيقة السؤال ده بيغلط فيه ناس كبار في المجال مش حد لسا بيبتدي
وبتلاقي أقوال زي ” لو هتشتغل الخليج اشتغل على تويتر وسناب وغيرهم.. “
وعشـان احنا ناس بتوع Performance فـ احب اقولك انك مش محتاج تسأل اشتغل على انهي بلاتفورم
ولكـن ممكن تجرب وتشوف النتايج.. والنتايج دي مش هتكون مقتصرة على الـ CPP بس
ولكـن هتكون معتمدة على نسب التسليمات والتأكيدات وسعر المنتج ونوعه
وده هينقلنا على السؤال الرابع والأخير
أشتغل على منتجات ايه ؟
فكرة انك تخصص نفسك تشتغل على حاجة معينة او منتج واحد ده مش حاجة وحشة
لكن انا من مدرسة الشغل على المنتج الكسبان يعني انا بجرب منتجات كتير والمنتج اللي بيبقا كويس ببدأ اشتغل عليه
وخد مني النصيحة دي ” هتوصل لمرحلة انك بتعرف المنتج الكسبان ده اول ما تشوفه بس من غير ما تعمله تيست حتى “
بس دايما ركز في جزئية ان مش كل المنتجات بتنفع لكل الأسواق
يعني ايه بقا ؟
يعني متروحش تجيب منتج زي ” المروحة ” وتبيعه في بلد شتاء طول السنة اصلا it’s not make sense
مثال 3 :
لو انت قاعد بتختار منتجات ووقع قدامك منتج ” مكواة فرد الشعر “
ف حضرتك أخترته وقولت هو ده المنتج التمام اللي هشتغل عليه
ولقيت نفسك هتشتغل في السعودية
* اول حاجة هتعملها هتغير اسم المنتج عشان لو كتبت مكواة فرد الشعر هتتفهم غلط * 
تاني حاجة هتروح تدور على البلاتفورم اللي هتشتغل عليها
ف قولت انا هختار انستجرام مثلا على اعتبار انها بلاتفورم عليها بنات كتير ودول اكتر فئة هتشتري المنتج
وبعد الـتيست لقيت ان النتايج حلوة اوي بس التسليمات وحشة وهنا بقا هتروح لمرحلة تالتة وهي انك تبدأ تحلل الأسباب بتاعت التسليمات الوحشة دي وتشوف العيب فين ولو في الـبلاتفورم تبدأ تشوف غيرها..
وبس كدا يا سيدي دي اجابات الأسئلة اللي ” مينفعش تتسأل “
وفي الختام انا بكتب البوست ده وانا مش في احسن حالاتي النفسية ف لو وصلت لغايت هنا أدعيلي دعوة حلوة بضهر الغيب 