اسأله الجمهور
في سؤالين حلوين اوي شفتهم في الرسايل عندي امبارح 
وحبيـت اني أكتبلهم البـوست ده عشـان لـو حد بيسأل نفسه في نفس الحاجة دي يستفيد
السؤال الأول : مساء الخير يا مستر اخبارك ايه يارب تكون بخير كان عندي استفسار تنصحني بأية لو عندي خبرة متوسطة في ال ECOM وخبرة كبيرة في الميديا باينح عموما لأني كنت شغال cpa and affiliate marketing فترة كبيرة
بس حاليا شبه مش معايا رأس مال بسبب شوية ظروف كدا
فهل تنصحني او في قدامك فرصة شغل ريموتلي في مكان لحد ما اقف على رجلي ولا ابدأ بشكل صغير دروبشيبينج في مصر مثلا او دولة تانية بأقل رأس مال
السـؤال الثاني : كنت عاوز اشتغل ف E-commerce وكنت محتار ف التلاته اشتغل دروبشيبنج ولا افلييت ماركيتنج ولا اتعامل مع مورد واجيب جمله واخزنها عندي واتعامل مع شركة شحن توصلي الاوردرات.. انا حالياً بدرس ديجيتال ماركيتنج وبتعلم ميديا باير
اجابة السؤال الأول :
لو عندك خبرة متوسطة في الـ Affiliate والـ E-Commerce فـ انت معاك Tools مهمة جدا تبدأ بيها E-Commerce او تبدأ الـ Project بتاعك خصوصا لو عندك الخبرة دي في بلاد تانية غير مصر
طيب انا مش هقـدر ابدأ الـ E-Commerce بتاعي حاليا عشان راس المال فـ اعمل ايه ؟
نصيحتي انك تنزل تشتغل..
ومتستغربش من تنزل تشتغل دي انت خبرتك لسـا موصلتش لأنك تقول انك قادر تفتح الـ Project بتاعك فـ بالتالي الأحسن ليك انك تنزل ” توسخ ايدك ” في المجال تشوف الشركات بتعمل ايه تشوف الناس بتوع الـ E-Commerce الـ Cycle بتاعتهم عاملة ازاي
وبعـيدا عن ان ده هيعملك دخل ثابت تقدر بيه تستقر ماديا الى حد ما الا انه هيعلمك كتـير جدا والنصيحة دي مجربة على أكثر من شخص ومعرفوش قيمة انهم نزلوا غير لما عرفوا حاجات كتير هما مكنوش يعرفوها
طيب هل تروح تشتغل دروب شيبينج !
متشتغلش دروب شيبينج ولا تعتمد عليه عشان تكبر راس مالك غير لو واثق بنسبة 100% انك عنـدك منتج هيحققلك ربح او لو لقدر الله خسرت تبقا عارف هتخسر قد ايه وتطلع بأقل خساير ممكنة غير كدا هتبقا بتشتغل في الفاضي… فـ انت هتبقا داخل تضيع راس المال القليل اللي معاك بالفعل وده شئ مش صح
طب انا معايا راس مال صغير اتحرك فيه ازاي… قدامك حلين اما انك تعمله Save لـ حين ما تكون قـادر تتحرك فيه
او انك تبدأ تطور بيه نفسك بـ كورسات او غيرها لأن ده اللي هتحتاجه في طريقك وشغلك
طب اجابة السؤال التاني ايه بقا ؟
اجابة السؤال التاني بتعتمد على شوية عوامل.. راس المال – الخبرة – الوقت
الدروب شيبينج مناسب لو راس المال قـادر انك تخاطر بيه وعارف ازاي تطلع منه لو لقدر الله خسرت بأقل خساير
ومش مناسب لو مش فاهمه او مجربتش قبل كدا
الـ Affiliate مخاطرة أقل بـ شوية كتير بس المنافسة فيه عالية لكـن ارشحهولك لو انت في البداية وعايز تجرب وتعتمد على نفسك
الـ E-Commerce او البيزنس الخاص بيك متفتحش غير لو انت فاهم فاهم فاهم فاهم وحط تحتها مليون خط عشان مترجعش تندم
انت ممكن ميكونش معاك راس مال تفتح الـ E-Commerce بتاعك ولو معاك وجبت منتج فـ انت دفعت تمن المنتج كامل ولقدر الله خسرت في شحن او تأكيدات او غيرها فـ انت خاطرت وخسرت كل حاجة حرفيا
يبـقا العامل المشتـرك في كل ده
– متخاطرش براس المال اللي معاك كله الا لو عارف هترجعه ازاي او هتقلل خسارتك ازاي على قدر الأمكان
– انزل واتعلم ووسخ ايدك عشان بعد كدا تفتح وانت متطمن ولو هتقع في 100 غلطة لو نزلت وخدت خبرة هيبقوا 99 فـ هتتفادى الغلطات
– خبرتك في الـ Media Buying او الـ Marketing مش كفـاية عشان تفتح الـ E-Commerce Business بتاعك