ازاي تعامل مع المتغيرات الجزء التاني

ازاي تعامل مع المتغيرات الجزء التاني من السلسلة الجميلة اللي يارب أعرف أكملها

أتكلمنا البوست اللي فات عن الـ Products والـ Winner Product بشـكل خاص

لو مشوفتش البـوست ده ارجع تاني شوفه عشان تقدر تستفيد من البوست ده كامل الإستفادة

وكـالعادة البوست ده طويل فـ لو وراك حاجة دلوقتي اعمله Save وابقا قابلني لو فتحته تاني

بعد ما اخترت المنتج هتدخل معايا الرحلة دي من أولها كدا

بعد اختيارك للمنتج هتبدأ تفكر هو انا هشتغل على انهي Platform

اختيار الـ Platform من اهم الحاجات اللي هتعملها

هنتكلم انهاردة على اول 2 platforms بنفكر فيهم واحنا بنشتغل في مصر

1- فيس بوك وانستجرام ” وهنتكلم عليهم على انهم واحد هنا بما ان ممكن تعملهم اعلانات من نفس المكان “

2- تيك توك

خلينا نبدأ بأول بلاتفورم الا وهي الـ Facebook

لو هتبدأ تشتغل على الفيس بوك ف اول حاجة هتفكر فيها ايه نوع الأعلانات اللي هشغلها

من وجهة نظري المتواضعة اكتر نوعين اعلانات بينفعوا ” الرسايل – الكونفرجن “

انا سامع صوت الناس اللي بتقول ان الرسايل مش معمولة عشان نـ Lead sales وان الـكونفرجن هي اللي على اساسها نقدر نحدد كل حاجة

واحب اقولك اني مش مختلف معاك في الكلام ولكن على صعيد أخر اعلانات الرسايل شغالة كويس جدا جدا في المبيعات وبتعمل نتايج كويسة سواء على مستوى الـ Cost او الـ Delivering

حد هيججي ويقولي ليـه نسبة التسليمات اعلى في الـرسايل ؟

خليها وهقولكم عليها في الأخر بس نكمل الحتة دي

خلونا نحط اساسيات قبل اي حاجة سواء هتشتغل رسايل او كونفرجن

الأساسيات دي هتبقا عبارة عن

– الـ Creative

– الـ Content

لو قولنا ان الأعلان 100% فـ الأتنين اللي فوق دول 50% وباقي الأعلان بالأستهداف بتاعك بالأستراتيجي بـكل حاجة 50% تانية

الـ Creative بتاعك ليه اختيارات كتير اوي وانت شغـال سواء صورة او فيديو أو Carousel او Collection

كـل اختيار من دول ليـه استخدام مختلف عن الـتاني وكل واحد هتستخدمه في جزء من الـ Funnel بتاعتك

بس خلينا نقول انك لو بتشتغل لسـا على المنتج جرب عليه الـصورة والفيديو وشوف ايه بيجيب احسن معـاك

الـ Content بتاعك لو مخلاش الشخص يكمل البوست او يتفرج على الفيديو او حتى يعمل لايك فـ اعرف ان فيه مشكلة

الحتة دي بالذات في الـفيس بوك هتلاقيلها Metrics كتـير جدا زي الـ Post like والـ CTR والـ Post comment والـ Video views والخ الخ

المنطقي والطبيعي انك لما تشوف الحـاجات دي كلها كويسة يبقا الـ Creative والـ Content مفيهومش مشاكل

لكن لو الـ Metrics بتاعتك فيها مشاكل فـ اعرف ان في مشكلة فيهم

نكمل كلامنا ونبدأ بأعلانات الرسـايل

اعلانات الرسـايل من أكتر انواع الأعلانات اللي شغـالة ” في مصر ” وبتجيب اوردرات ب كوست قليل.

طيب ليه النـاس بتلجأ للـ Conversion وبتسيب الـ Messages ؟

أولا : الرسـايل فيها ضغط كبير جدا وعـاملة زي الحلقة اللي لو في حتة فيها اتفقدت هتلاقي الـباقي كله باظ وفي رسايل ومفيش اوردرات

ثانيا : لو بتكسيل على منتج وعايز تطلع عدد اوردرات كبير في اليوم ف بنسبة 90% مش هتعرف تعمله بالرسايل وده عشان انت هتبقا محتاج Moderation team جبار و Moderation system مش بس الـ Inbox

ثالثا : ان الأعلانات بتاعت الرسايل مش كـل وقت بتشتغل وده لأن الغرض الأساسي بتاعها مش بيكون الـ Sales زي م قولنا فوق ولكن هي بتندرج تحت بند الـ Engagement

رابعا : الـ Tracking وخليني أقولك ان دي من أهم الأجزاء في موضوع انك يكون عندك website لأن انت هيبقا عندك داتا كتير لكل العملاء سواء دخلوا الموقع او اشتروا او دخلوا الـ Checkout بتاعتك

طيب يا عم قنديل انت قولتلنا عيوب كتير في اعلانات الرسايل

قولنا بقا احنا ليه نشتغل رسـايل بقا ؟

ببساطة لو مش معاك بادجت كبيرة ومش هتعرف تعمل ويب سايت او سعر الـكونفرجن عليك هيبقا كتير فـ اشتغل رسـايل

ولو مش فاهم الـ Sales Funnel ماشية ازاي والـ Testing في الـ Conversion campaigns عامل ازاي ف بلاش تدخل في المفرمة دي

” اتعلمها وسيبلها وقت لما يبقا معاك البادجت المناسبة وابدأ “

طيب انا مش معايا بادجت وبدأت اشتغل على منتج رسـايل

بس مفيش اوردرات اعمل ايه ؟

في الحالة دي هتبدأ تبص على كل الـعوامل بتاعتك من أول الـ Product والـ Campaign target والـ Message scenario

يمـكن من أهم الحاجات هي الـ Message scenario وهي ببساطة من اول ما العميل يخش يقولك ” السعر كام ” ولغايت ما تقفل معاه بأنه ” تمام عايز احجز ” او ” شكرا مش عايز احجز “

ولو عايزين نتكلم عليها في بوست تاني قولولي نتكلم فيها عشان منطولش البوست ده اكتر ما هو طويل

اشتغلت رسـايل يا سيدي وبدأت الدنيا مـعاك تبقا كويسة والمنتج اللي كـنت بتطلع منه قطعتين بقيت بتطلع منه

50 و 100 وواقف على الأسكيل ده ومش عـارف تطلع أكتر من كدا هتعمل ايه ؟

هتاخد جزء من الفلوس كسبتها دي وتروح تعمل ويب سايت

طيب اعمل الويب سايت ازاي ؟

أسهل طريقة دلوقتي ممكن تعمل بيها ويب سايت هي المنصات الجاهزة

زي shopify و youcan ولو اني مبحبش المنصات دي وماشي بمبدأ متزرعش في أرض غيرك ولكن ك بداية ليك هتبقا كويسة جدا ومش هتكلفك كتير

عملت الموقع اللطيف بتاعك وحطيت عليه منتج او اتنين هتبدأ شغل عليهم ” وبالمناسبة مش لازم يبقا عندك 100 منتج عشان تعمل ويب سايت “

ابدأ ظبط البرودكت بيدج بتاعتك والـ Checkout page والـ Pixel والـ Verify domain وكل حاجة ” ولو مش فاهم الحتة دي قولي نتكلم عليها في بوست تاني برضوا “

وادخل اعمل أول اعلان كونفرجن بقا يا معلم

طيب انا كلمتك على عيوب الرسايل تعالى نتكلم على عيوب الـكونفرجن وايه اللي ممكن يكرهك في حياتك في نوع الأعلانات دي

مبدأيا قبل ما تشغل اعلانات كونفرجن اتأكد انك مظبط البيكسل ومظبط الـأنالتكس بتاعك ويا سلام لو مظبط داتا ستوديو كمان عشان متلفش حوالين نفسك وتسهل على نفسك تحليل الداتا

الكونفرجن من احسن انواع الأعلانات اللي هتشتغل عليها اللي بتـ Lead sales

ولكن اول حاجة هتقابلك ان حضرتك عامل بيكسل جديد ومفيهوش داتا ولسـا هتعمل ليه Warm up ف حضرتك متستعجلش النتايج

تاني حاجة اعلانات الكونفرجن احنا مش بنبص عليها كل دقيقتين ونقول اصلها مجبتش اوردرات

وحضرتك هتبص على كل الـ Metrics وحرفيا كل الـ Metrics عشان تعرف هي فيها امل اصلا انها تحقق نتايج او لأ

تالت حاجة الـ Users

بص يا سيدي الشعب المصري بيتميز ب خاصية ” انا حجزت الأوردر اه بس انا مش عايزه ” هو مش بيبقا متخيل تقريبا ان هو فعلا طالب اوردر ف هتضطر تأكد الأوردر معاه بعد ما يطلب على طول عشان تتأكد انه طالب الأوردر فعلا مش داخل يجرب يشوفلك الموقع شغال ولا مش شغال

أعتقد اننا كدا اتكلمنا عن الـفيس بوك وقولنا الـحاجتين اللي شغالين فيه بيعملوا مبيعات وادينا Hint على الحاجات اللي ممكن ناخد بالنا منها

نيجي بقا للجزء التـاني وهو أعلانات الـ Tiktok

لا اخفي عليكم قولا اعلانات التيك توك كويسة جدا والـ CPP بتاعها أقل 5 مرات من الفيس بوك

ولكـن الـقصة بقا في نسب تأكيداته وتسليماته

على التجربة الشخصية نسبة تسليمات التيك توك في مصر لا تتعدى الـ 30% وبتكلم على نسب التسليمات هنا من التأكيدات مش من الـ Over all

وهقولك بقا ان انت لو عامل تسعير مظبوط وحاسب كويس نسبة تسليماتك على اقل حاجة وبتجيب كوست قليل ف اعلانات التيك توك هتبقا كويسة

مش Effective زي اعلانات الفيس بوك ولكـن فيها potential ومش هتخسر حاجة لو شغلتها بس زي م قولتلك تبقا حاسبها صح

الـ Variations في اعلانات الـ Tiktok كتير جدا وفي نفس الوقت المنصة موفرة Studio تقدر تعمل فيه كل حاجة وتعدل على فيديو المنتج بتاعك عشان يبقا شكله كويس ويجيب نتايج

ضيف على كدا الدعم اللي بتقدمه سواء على مستوى البيزنس او على مستوى النتايج

هيقابلك مشكلة صغيرة بس ان مش كل الفيز بتقبل على تيك توك ولكن مشكلة محلولة يعني ممكن تحلها بماستر كارد هتقبل معاك عادي

تيك توك مش لازم تعمله بيدج ولا اي حاجة والأعلان بيتببلش عادي مفيهوش مشاكل

اعلانات التيك توك مفيهاش تعب كتير والنوع اللي بيجيب Sales هو الـ Conversion بدون نقاش على ده

مش هتلاقيها مختلفة كتير عن اعلانات الفيس بوك كتير وتقريبا كل البلاتفورمز هتلاقوا نفس المتغيرات جوة الـ adset نفسها مع بعض الأختلافات

في اختلافات كمان في الأستيراتيجي ذات نفسها خصوصا ان تيك توك من الـ Platforms اللي لسـا مش مفهومة اوي ل ناس كتير ف بنخبط فيها واللي بيطلع بـ Case كويسة بينشرها مع الباقيين

انا حاسس ان البوست طول مني سيكا ومقدرتش اقول برضوا كل اللي انا عايز اقوله ولسا في اجزاء تانية ولو عندكم اقتراحات او حاجة عايزني اتكلم فيها ممكن تكتبوها في الكومنتات

اتمنى تكونوا مقدرين المجهود اللي اتبذل في البوست ده اهم حاجة ولو عايز تاخده ممكن تشيره وهتبسط اوي والله

وفي الختام لو وصلت لغايت هنا أدعيلي دعوة حلوة بضهر الغيب