احلام مشروع الملابس
نتكـلم جد شوية ؟!
معاك ٥٠٠٠ج ومش عارف تعمل بيهم ايه
تعالى اقولك تعمل بيهم ايه
١- مبدأيا كدا وعشان نبقا على نور اوعى تروح تشتري بيهم هودي مطبوع من اللي بـ ١٠٠ج
٢- متبعش منتج انت جايبه بـ ١٠٠ج بـ ٢٠٠ج
٣- متتخيلش انك هتسلم ١٠٠% من الأوردرات اللي بتطلعها من الفـيس بوك
٤- الكاش فلو بتاعك مش بيمشي ب دورة المبيعات مش عدد القطع
بما ان الـفيديو بتاع الهـودي اللي ب ١٠٠ج ده منتشر الفتـرة دي فـ خليني احلله من وجهة نظرنا في السـوق بقا
اولا انت ممكن تروح تشتري هودي مطبوع بـ ١٠٠ج عادي بس خليني أقولك انك هتبقا جايب كيس زبالة متفصل في شكـل هودي
اصل لو جـيت حسبتها حسبة بسيطة كدا خامة الميلتون المتوسطة عامله حوالي ٢٠٠ج ” تكلفة قماش “
الهـودي تقريبا بيكون وزنه حوالي ٦٥٠ جرام يعني بتتكلم في تكلفة قماش ١٣٠ج
ضيف عليها مصنعية ٣٥ج و طباعة ١٠ج يبقا كدا وصـلت لـ ١٧٥ج ” تكـــلفة ” ده من غير ما تعمل كيسة او تيكت او اي حاجة
وجايبلك خامة سعرها كمان مش عالي لأ خامة وسط في السوق وبنسبة كبيرة هتكون بتوبر
طيب يـ قنديل انت حسـبت كدا الهودي بعد الكيس والتيكت وكل القصص دي بـ ١٨٠ج مثلا ؟
خلينا نقول اه كدا الهودي يتكلف ١٨٠ج – تيجي بقا نسعره بشكل صح
حط عليه فلوس الـ Overhead او الأوبريشن بتاعك
وحط عليه فلوس الربح اللي انت عايز تكسبه
وحط عليه فلوس الأعلانات مضروبة في متوسط نسبة التسليمات
وحط عليه فلوس الشحن لو انت عامل شحن مجاني
هتلاقي الهودي اللي مكلفك ١٨٠ج انت بتبيعه بـ ٤٥٠ج على الأقل بعد الحسابات اللي انا قولتهالك فوق دي
يعني انت ي قنديل بتقولي اني هبيع الهودي بأكتر من ١٠٠% من سعره الأصلي ؟
اه عادي انك تبيع كدا مفيهاش اي مشكـلة الفكـرة هنا في التسـعير اننا سعرنا بناءا على التكاليف الظاهرة قصادنا محطيناش في اعتبارنا اي اعتبار اخر من اعتبارات استراتيجيات التسعير المختلفة
امال ايه بقا اشتري ٥٠ هودي والهودي بـ ١٠٠ج والقصص اللي بنسمعها دي ؟
مش كل حاجة تسمعها تصدقها ومش كل حاجة حد يقولك عليها تقول هي دي فعلا الصح
الفـكرة ان الناس بتحاول توهمك ان الموضوع سهل عشان يقـدروا يكسبوا من وراك بقدر الأمكان
محدش هيقولك الموضوع صعب ومكلف ومحتاج منك مجهود كبير وطاقة مش هتخلص
محدش هيجيي يقولك خد بالك المشاكل اللي هتواجها والخسائر اللي ممكن تحصلك لو انت مش قدها متدخلش من الأساس
مجـال الملابس مجال مغري جدا انا مقدر ده جدا بس صدقني اللي بيدخل ويغلط ويخسر اكتر من اللي بيكمل ويكسب