أسعر المنتجات ازاي ؟

بداية وقبل اي حاجة شكرا لكل الكومنتات الحلوة بتاعتكم على بوست نسبة التسليمات

واسف لو مقدرتش ارد على حد سواء في رسايل او كومنتات

هحطلكم شيت اكسيل يسهل عليك البوست كله في اول كومنت

خليني ابدأ الموضوع بالسؤال اللي بيتسأل على طول

أسعر المنتجات ازاي ؟!

بس قبل ما اجاوب على السؤال ده خلينا نتكلم شوية عن الـ E-commerce Process Cycle

تعالى نجيب بقا الموضوع من الأول

منتج – ويب سايت – كول سنتر – مخزن – شحن – عميل – استرجاعات – خدمة عملاء – حسابات

دي الـ Cycle بكل بساطة ومن غير تعقيدات وتقريبا ده اصغر شكل هتشوفه في الـ E-Commerce وبتختلف شكل الـ Cycle دي على حسب حجم البيزنس بتاعك

المهم تخلي في دماغك ان كل خطوة من دول انت بتصرف عليها حتى لو مش حاسس

بمثال بسيط :

الويب سايت اللي حضرتك عامله بتصرف عليه هوست ودومين وبلاجنز وغيرها

وكل دي فلوس انت اصلا ممكن متكونش حاططها من ضمن الـ Cost وبتخسرها كل شهر برضوا وانت مش في دماغك

طيب الـ simple process شكلها عامل ازاي

المنتج بيجيي يشتغل عليه تيم الماركتينج ويجيبلك Leads تتحول مع الـكول سنتر لـ مبيعات وتروح بعد كدا المبيعات دي تطلع من المخازن لـشركة الشحن وشركة الشحن تسلمها للعميل ” ومتفكرش ان كدا انت خلصت “

انت لسا عندك يا معلم ما خدمة ما بعد البيع ومتابعة شركة الشحن واللي راح ايه واللي رجع ايه وبعدين تشوف حساباتك طالعة بالموجب ولا بالسالب.

انت حسيت دلوقتي انك طلعت عن الموضوع كله ومش عارف ايه اللي دخلك في الحوارات دي وكل اللي انت عايز تعرفه اسعر ازاي وخلاص

بس خليك مكمل معايا للأخر

تعالى الأول نتكلم عن انواع المصاريف اللي انت هتقابلها وانت شغال هتبقا عاملة ازاي

احنا عندنا 3 انواع من المصاريف بس خليني اختصرهملك واخليهم اتنين عشان متتوهش مني اكتر ما انت تايهه

1- مصاريف ثابتة

2- مصاريف متغيرة

المصاريف الثابتة هي المصاريف اللي مش هتتغير مهما زودت الأوردرات او قللتها هي كدا كدا ثابتة وبتكلفك فلوس كل يوم

المصاريف الثابتة زي الأيجارات – المرتبات – التأمينات – الضرايب

اما المصاريف المتغيرة ف هي المصاريف اللي بتزيد او بتقل عليك على حسب حجم الأوردرات بتاعك وأهمها طبعا هي مصاريف الأعلانات اللي بتتصرف كل يوم

بين المصاريف الثابتة والمتغيرة في حاجات بتندرج تحت مصطلح ” مصاريف شبه متغيرة ” يعني ساعات تلاقيها ثابتة وساعات تلاقيها زي ما هي ومتخلنيش اخش فيها دلوقتي عشان البوست ميطولش مني لو عايز تعرف عنها اكتر ممكن تسيرش على جوجل هتفهم كل حاجة.

طيب بعد ما قسمنا المصاريف وعرفنا هنطلع مصاريفنا ازاي انت دلوقتي بيدور في دماغك سؤال واحد ” ايوة انا اعمل ايه برضوا ؟ “

أولا : هتبدأ تحسب مصاريفك اللي قولتها فوق دي سواء ثابتة او متغيرة

ثانيا : هتطلع حجم المصاريف دي قد ايه وتبدأ تقسمها على مجموع

الأوردرات المتوقع انك هتطلعها كل شهر

ثالثا : هتقسم النسبتين على بعض هيطلعلك النسبة اللي المفروض تزودها على الأوردر الواحد من مصاريف

رابعا : هتاخد النسبة دي وتحط عليها الـربح المتوقع هيطلعلك التمن اللي المفروض تبيع بيه المنتج من الأساس

بس خد بــالك انت لسا محسبتش نسب تسليماتك وتأكيداتك ومرتجعاتك يا حبيب قلبي

طب ودي هحسبها ازاي يا قنديل ؟

بص يا سيدي من وجهة نظري التي لا قيمة لها على الأطلاق انا دايما بحب احسب على الـ worst case scenario

يعني من الأخر بحسب دايما أقل حاجة ف بخلي في دماغي ان نسبة التسليمات عندي بعد التأكيدات 45%

هتيجيي تقولي ازاي وده قليل جدا ومستحيل طبعا ده انا شركة الشحن متفقة معايا على 90% تسليمات ولو قلت عن كدا هغيرها

– حماس البدايات ده هو اللي مودينا في داهية خدوا بالكم –

المهم يا سيدي شركة الشحن تحسب زي ما تحسب وانت برضوا احسب زي ما تحسب انا بكلمك على النسبة اللي انا بحب احسب عليها

الا وهي الـ 45%

طب انا جبت النسبة دي من عندي ؟

اكيد لأ ما انا شغال في السوق وعارف اللي بيحصل ف عشان كدا بقولك خدها من بدري واحسب التسليمات على النسبة دي

وراجع برضوا بوست نسب التسليمات لو مش فاهم عشان يوضحلك اكتر قصدي ايه بالذات في النقطة دي..

المهم يا سيدي بعد ما هتحط النسبة دي انا متأكد بنسبة 99% انك هتبقى في الـ safe side ومش هتلاقي خساير غير لو انت اصلا عندك مشاكل تانية غير التسعير بس مش التسعير المشكلة الأساسية

طب أكمل كلامي بقا واقولك بعد ما تطلع نسبة التسليمات دي هتروح تضربها في الـ Profit اللي طلعته بعد ما حطيت مصاريفك هيطلعلك حاجة اسمها Net profit او بالعربي صافي الربح ودي النسبة المتوقع حضرتك تكسبها بعد نسبة التسليمات القليلة وبعد حساب المصاريف كلها

طب انا هستفيد بالنسبة دي ايه ما انا كدا كدا حاطط مكسب ٥٠ج على القطعة مثلا ف انا عارف انا هكسب ايه

بص يا سيدي انا عايزك تبص على شيت الاكسيل اللي انا عامله وتبدأ تحط فيه أرقامك واحدة واحدة وشوف في الأخر الرقم اللي انت كنت حاطه في دماغك طلع صح ولا غلط..

شيت الأكسيل انا حاطط فيه معادلات بسيطة للحاجات دي مجرد ما هتحط الأرقام هتلاقي كل حاجة بتظهرلك مظبوطة

انا تقريبا كدا خلصت مقولتش للأسف كل الكلام اللي كنت عايز اقوله بس لقيت البوست هيطول مني جامد جدا ف هنكمل بإذن الله لو عندكم اي اسئلة في بوست تاني

ملحوظة :

كل اللي انا كاتبه ده بناء على تجربة حصلت معايا وبعملها من ساعة ما كان عندي جروب ببيع عليه منتجات واخدها من محلات ومكنش بيشتري مني غير اصحابي وقرايبي ولحد دلوقتي الحمدلله